Kongsbókin er elsta varðveitta savnsskjal/handrit á Tjóðskjalasavninum, og er tað einasta skinnhandrit, ið er til skjals í Føroyum.

Kongsbókin hoyrdi til løgmansembætið í Føroyum.

Kongsbókin er ein lógbók, sum er samansett av tveimum skinnhandritum, har tað minna handritið inniheldur Seyðabrævið og tað størra norsku Landslógina, sum varð lógtikin á Gulatingi í 1274. 

1. Síða 2 - 147 er norska Landslógin frá 1274
2. Síða 148 - 154 er Seyðabrævið frá 1298
3. Síða 155 - 163 vóru lagdar afturat seinni, harav síða 156 er ein tekstur og síða 158 - 160 er ein avskrift av einum brævið hjá Hans kongi frá 1491

Kongsbókin var innbundin av nýggjum í 1599 av Peder Jacobsen ið var løgmaður í Føroyum frá 1588 til 1601. Hetta sæst á permuni og baksíðuni.

Hetta er ein endurskanning við betri góðsku av Kongsbókini. Ein eldri skanning sum er áður løgd út á history sæst her.

Kongsbókin er givin út í prentaðum formi.

Tað er Andras Mortensen, lektari í søgu á Fróðskaparsetrinum, sum hevur skrivað søguligan inngang, umsett úr handskrift og týtt.